Aksidente di trafiko ku 3 morto na Willibrodus

KOMUNIKADO DI  KUERPO POLISIAL KÒRSOU

WILLIBRODUS, Curacao — Djasabra 19 di desèmber alrededor di 19.50’or, Sentral di Polis a risibí notifikashon di un aksidente di tráfiko basta serio entre un outo di famia i un konvoi, riba e kaminda di San Willibrodus na altura di Hermanus.

Unidat di Barber ku a yega na e sitio a bin topa e tres okupantenan di e outo di famia den un situashon kritiko i mesora a pidi presensia di ambulans i e vehíkulo di reskate di brantwer.

Na yegada di e personal di ambulans, nan no por a hasi nada mas pa e víktimanan i a solisitá presensia di dòkter di polis na e sitio, ku a konstatá morto di e dos hòmbernan:

 Hainrick Martina nase na Kòrsou dia 28 di febrüari 1977;

 Ruvien Kopra, nase na Kòrsou dia 22 di ougùstùs 1984 

 Yennifer Katherine Pereira Morales nase na Venezuela dia 4 di yanüari 1990.

For di investigashon preliminar a sali na kla ku e outo di famia ku tabata kore den direkshon di Weg naar Westpunt, pa un motibu te ainda deskonosí, a bai kore riba man kontrario i dal kontra un konvoi ku tabata bayendo direkshon di San Willibrodus.

Konsekuensia di esaki tabata un aksidente praktikamente frontal entre e dos vehíkulonan aki. Esakinan ta bira e di 17, 18 i 19 morto den tráfiko pa aña 2015.

Departamentu di Tráfiko ta enkargá ku e investigashon.

Source: 721 news Aksidente di trafiko ku 3 morto na Willibrodus