Arubiano asesina na Republica Dominicana

Republica Dominicana — Famia Tromp a lanta awe cu un mal noticia cu a conmove tur cu conoce nan ser keri, Audrey Tromp cu nan a haya morto hunto cu su pareha Bob Torcas den nan cas situa na Cabrera na Republica Dominicana.

Autoridadnan Dominicano ta investigando e caso y como tal no por bisa cu exactitud con e asesinato a sosode, ki dia y ni tampoco cuanto sospechoso tin envolvi.

For di Departamento di Relacionnan Exterior di Aruba nos a compronde cu ya caba a cuminsa cu tramitenan via Embahada Hulandes pa mira con lihe por manda su restonan mortal pa nos isla. Ora Arubianonan muri den exterior, ta henter un papeleo mester atende cune, pa legalisa documentonan oficial di su morto y pa mand’e como carga via mortuario.

Famia a conta cu ultimo contacto cu Audrey Tromp tabata dia 31 di december, bispo di aña nobo. Ora cu su mayan no a tende di dje, a pensa cu kisas comunicacion a cay afo. Ta custumber cu na Republica Dominicana constantemente internet ta bay, coriente ta bay, awa y asina por sigui menciona. Pero ora cu a bira dia 2 di januari a cuminsa preocupa y a manda amigonan pa bay e cas pero nan no a sali. Awe dialuna. 4 di januari ora e hardinero a yega e cas, situa den un area residencial, a mira un scenario abnormal pa cual a yama Polis mesora.

Ey a bin haya Audrey Tromp y su pareha di hopi aña morto den e cas. No por saca afor ainda cuanto dia nan tin morto eyden, pa cual awor e ekipo forensico di Polis ta investigando.

Audrey Tromp ta naci na Aruba dia 12 di september 1958 y su pareha Bob Torcas ta naci na Merca dia 5 di mei 1946. Desde aña 2009 nan a bay biba na Republica Dominicana unda nan a habri nan compania cu ta bende pisca cu varios isla den Caribe, entre otro Aruba. Nan ta bende calco y lobster cu restaurant y hotelnan riba nos isla. Tambe sa manda fruta fresco di Santo Domingo pa fruterianan local.

Diaranson awor famia di Aruba lo sali pa Republica Dominicana pa pone nan mes na altura di e investigacion y pa busca tur forma pa trece nan ser keri pa dera aki na Aruba. Mayornan di Audrey Tromp ta biba na Paradera y su famia y amigonan ta den un tristesa masha grandi despues di e informacion lamentabel aki.

Audrey Tromp no ta casa y no tin yiu. Pas na su restonan y hopi forsa na famia den e momentonan dificil aki.

Source: 721 news Arubiano asesina na Republica Dominicana

LEAVE A REPLY