KOMUNIKADO DI KUERPO POLISIAL KÒRSOU

2 detenshon i arma di kandela konfiská

Djabièrnè 8 di yanüari 2016, alrededor di 03.40 ’or, un patruya polisial a bai na un snek na Barber kaminda nan mester a tende zonido riba dak di e snek. E patruya ku a yega na e sitio a topa ku dos hòmber den e snek. Durante búskeda Polis a bin haña un arma di kandela skondí den e snek. Den plafòn di e snek polis a haña máskara i un ròl di tape. Tambe polis a haña un tas di skouder ku basta dòler merikano, Euro i plaka Arubiano i pega ku e snek polis a haña un outo skondí tras di un negoshi. En konekshon ku ariba menshoná Polis a detené e dos hòmbernan:  M.R.M.L., 24 aña di edat  J.W.A., 24 aña di edat Ámbos nase na Kòrsou. A konfiská e arma , e outo i tur sobra artíkulonan ariba menshoná pa mas investigashon. A bai warda ku e dos (2) sospechosonan na unda a presentá nan dilanti di un fiskal ouksiliar ku a ordená na enkarselamentu pa mas investigashon.

#

Kas na kandela.

Djabièrnè 8 di yanüari 2016 alrededor di 09.40’or, Sentral di Polis a risibí notifikashon di un kas ku tabata na kandela den Monte Verde. Mesora a dirigí un unidat polisial na e sitio huntu ku brantwer. Na nan yegada nan a topa un kas di palu ku tabata na kandela. Un outo den bisindario di e kas tambe a pega kandela. E kas a kima kompletu, i e outo tambe a haña daño konsiderabel parti dilanti dor di e kandela aki. Investigashon den e kaso aki ta kontinuá.

#

Kontròl di tráfiko.

Djabièrnè 8 di yanüari 2016 entre 09.00 pa 13.00 ‘or HIT Tim a tene un kontròl di tráfiko riba Roodeweg na altura di pòmp di gasolin. A kontrolá 185 vehíkulo i a parti un total di 31 prosèsverbal pa e siguiente infrakshonnan:  Kore outo sin reibeweis válido 8  Kore outo sin faha di seguridat 14  Kore outo sin seguro válido 3  Karchi di kùr kaduká 2  Lus di brek no ta funshoná 2  Kore sin hèlmu 1  Kore ku glas skur 1 Durante di e kontrol aki Polis a konfiská 3 vehíkulo ku a keda transportá ku kran pa Kurá. Ta supliká tur shofùr ku ta hasi uzu di nos kareteranan pa tin e dokumentunan di nan vehíkulo na òrdu, paso polis ta sigui ku e kontròlnan di tráfiko aki.

#

Detenshon pa maltrato relashonal.

Djabièrnè 8 di yanüari 2016, alrededor di 13.30’or di mèrdia Sentral di Polis a dirigí un unidat polisial na un kas den Kanga pa un kaso di maltrato relashonal. Na yegada di polis nan a topa ku e dama víktima ku a deklará na ku un ratu promé e tabata tin diskushon fuerte ku su kasa i esaki lo a sekuestr’é, menas’é ku morto i maltrat’é. Polis a detené na e sitio e hòmber sospechoso, R.E.B.Q., nasé na Kòrsou, di 40 aña di edat i a present’é dilanti di un fiskal ouksiliar ku a ordená su enkarselamentu pa mas investigashon.

Source: 721 news KOMUNIKADO DI KUERPO POLISIAL KÒRSOU