Gobierno no tin ningun intermediario den negociacionnan cu CITGO

ORANJESTAD(AAN): Minister Mike de Meza den un entrevista a laga sa cu e negociacion cu CITGO pa tuma refineria di Aruba ta sigui normal y no tin ningun intermediario sinta meymey di nan.

E mandatario a confirma pa prensa cu e conoce Roberto Rincon y a sinta na varios ocacion cun’e, mescos cu el a sinta cu otro inversionista y inversionistanan potencial.

Roberto Rincon no ta forma parti di negociacionnan y ponencianan haci pa cualkier persona no ta stop e negociacionnan. De Meza a bisa enfaticamente cu e ta laga e responsabilidad pa expresionnan eroneo cerca e personanan cu a haci nan, incluyendo e lider di fraccion di MEP, kende cada un ta para responsabel pa nan mesun expresion y ponencianan.

Mike de Meza a bisa cu gobierno semper a paga pa nan mesun hotel, biahe y cuminda relaciona na e reunionnan an Houston cu CITGO. “Na ningun momento ningun hende a manda avion pa Aruba” pa e delegacion di Aruba bay den avion priva pa negocia cu CITGO na Houston, el a agrega.

Tur cos a wordo haci segun regla, el a remarca.

De Meza a expresa cu tin investigacion tumando luga pa cu Roberto Rincon y gobierno di Aruba no tin nada di haci cu esaki y e resultado di e investigacion lo mustra tambe cu gobierno di Aruba no tin arti ni parti den e investigacion di Rincon.

E mandatario no ta nenga ningun momento den e entrevista cu e tabatin contacto cu Rincon, y na mas di un ocacion, e mes ta agrega. El a bisa cu e contacto a cuminsa rond di e di dos kwartaal di 2013, ora cu el a wordo introduci na Rincon como un comerciante potencial, kende, ademas, ya tabatin inversionnan haci na Aruba, como tambe Corsou, Merca y Europa. No tabatin ningun informacion den e screening cu lo por a causa cu gobierno pa ta contra di sinta cu Rincon.

Den e mesun rosea, el a bisa cu gobierno a sinta tambe cu Rubiales, EcoPetrol, Petrobras, y Petro China, mescos cu a sinta cu PDVSA, na varios ocacion. Ta “mil y un” persona a sinta cun’e a reuni cun’e y papia cun’e, De Meza a agrega. Roberto Rincon tabata un di e personanan aki.

E a añadi cu e ta haya lastima pa tur hende y ta spera pa Rincon cu e por sali for di dje y demostra cu e acusacionnan no tin base.

Roberto Rincon no ta forma parti di e negociacionnan. Un delegacion di gobierno a sinta na varios ocacion cu CITGO; Ministernan De Meza y Paul Croes a sinta cu CITGO y hasta na varios ocacion a sinta cu e president di CITGO.

“No tin ningun persona cu ta negocia pa nos meymey entre citgo cu gobierno. Gobierno di Aruba ta negocia directamente cu CITGO y CITGO ta reconoce gobierno di Aruba como e unico entity, e unico organisacion legal cu nan por sinta na mesa cun’e,” Minister Mike de Meza a finalisa bisando.

Source: Dutch Caribbean News Gobierno no tin ningun intermediario den negociacionnan cu CITGO