Mas arma cu peluca y handschoen confisca y dos detencion na Malmok

ORANJESTAD(AAN):Mas y mas Polis ta den accion. Ayera marduga a gara trahador di Ritz Carlton cu arma di candela banda di Montaña. Ayera anochi Polis Maritimo a aresta un homber den un Skyline shinishi, A 54904, na San Nicolas cu arma di candela.

Algo prome cu 11or tabata recherche di Oranjestad den un accion den e area di Malmok ta gara dos sospechoso den un Honda RHD. E auto sospechoso aki tabata tin dos homber medio rasta aden.

Mirando e cantidad di kiebro den e area di Malmok y vecindario a pone e agentenan den accion. Esaki a duna su fruto tambe. A topa cu e auto Honda A-59417 riba caminda. Asina a dune instruccion pa para.

Banda di Fisherman Huts a logra stop e auto. Asina a exigi ambos persona baha for di e vehiculo. Nan actuacion sospechoso a pone e agentenan bay den accion mesora pa listra den e auto tambe.

A bin topa prome cu peluca, handschoen y despues a corona e buskeda topando cu un arma di candela potente y carga cu bala den e auto. A bay over na detencion mesora.

E auto a keda confisca tambe. Polis ta keda piki mas y mas arma riba caminda den man di criminalnan cu menos bon intencion. Tremendo trabou di Polis.

Source: Dutch Caribbean News Mas arma cu peluca y handschoen confisca y dos detencion na Malmok