Minister Otmar Oduber: Cada incidente por causa un desater den mundo turistico

ORANJESTAD(AAN): E nightlife bibo ta den e area di hotel. Durante entrevista cu minister Otmar Oduber a mustre cu e problema a cuminsa ora e bouncernan pafo a bay yuda turistanan cu a wordo agredi. E situacion aki tin atencion di gobierno.

For di su colega di husticia sigur, ta haciendo su maximo esfuerso pa por naturalmente evita e tipo di sucedidonan aki. Sa cu Cuerpo Policial ta actua sumamente proactivo y por a mira cu den hopi ocasion tambe ta resolve casonan di atraco, maltrato of incidente, accidentenan cu ta tuma luga.

E area ta uno turistico. Minister Otmar Oduber a mustra su preocupacion pa e imagen naturalmente cu tin den e sector aki pa loke ta trata nos turismo. Turismo ta biba y un di e argumentonan principal cu hendenan ta bin Aruba ta e siguridad di Aruba y danki Dios nos ta gosa ainda di un siguridad hopi halto na Aruba.

Esey ta debi na e atencion tambe cu ta wordo brinda. Sinembargo cada incident por causa un desaster den e mundo turistico y el a pasa varios pais. Algo asina sosode ta capta atencion internacional.

Den e caso aki el a inicia cu maltrato di turistanan ta tuma luga y naturalmente mester mira e motibo pa cual esaki a tuma luga, segun e Mandatario.

Tur gremio y su ministerio y minister di asuntonan general y husticia a expresa na diferente ocacion cu si tin e posibilidadnan por yuda den e proceso aki sea cu mecanismo y fondo cu por haci e trabao di polisnan uno cu awor aki ta hopi bon pa loke ta resolve casonan, pero ban traha riba e parti preventivo.

Evita cu e caso mes ta tuma luga, pa cual polis mester actua y coregi e situacion, segun minister Otmar Oduber. Den e proceso tin e werkgroep cu a wordo forma entre minister presidente y minister di husticia y e gremionan comercial, den e caso aki y sindical, cual ta FTA, cu AHATA, cu tabata envolvi den e ultimo reunion, caminda a mustra e preocupacion y duna man necesario.

Si naturalmente a expresa na diferente ocasion e preocupacion cu tin pa e imagen di Aruba y pa nos percura tambe pa por duna e man necesario den e proceso pa evita cu dia di mañan, cualkier cos negativo por tuma luga. E zona ta keda un zona di trafico pisa cu cantidad grandi di turista.

E 95% di e turista cu ta yega Aruba ta den e area aki. Pero fuera di esey nos localnan tambe ta bishita e area aki. Tin esnan cu ta laboral den e area aki. Tin otro grupo di persona cu den high season, local cu ta bay pa haci comercio, pa tuma parti.

Ta haya un combinacion di turista, trahado, plus bishitantenan local mes den e area aki, ta haci e area aki masha vulnerabel y ta pidi atencion constantemente den forma preventivo tin presencia y esey ta loke cu minister Dowers ta bringa pe. Esaki ta nifica cu mester tin personanan, mester tin agentenan policial presente.

Proyecto di camara ta importante.Ta spera cu por termina cu esaki mas pronto posibel. Manera cu a expresa, di parti di e ministerio di turismo ta dispuesto pa yuda den forma mas agresivo purba duna ekiponan necesario den e area turistico pa por evita incidentenan asina segun minister Otmar Oduber.

Esaki ta pa motibo di e concentracion grandi asina. Aunke ta dificil mirando e trafico pisa di hende tir ta purba evita diferente cos. Mester ta sigur pa agota tur recurso cu tin den e caso aki, pa preveni cualkier incidente den e area.

Hunto cu esaki, ta hopi importante. E tema di aki lo bin den reunionnan di board caminda e tema aki mester wordo comparti cu sector priva tambe pa traha pro activo. E responsabilidad aki no ta di gobierno so.

E ta un responsabilidad comparti cu mester tin. Esaki ta pa por yuda den e proceso aki pa evita pa traha pro activo cu tipo di incidentenan asina cu ta tuma luga. Tin documento cu a wordo firma den pasado cu lo wordo repasa tambe pa mira si entre otro hotelnan, restaurantnan, tiendanan cu tin parkeo priva, ta bezig ta poniendo e luznan necesario riba nan parkinglot.

Si nan ta poniendo e camaranan necesario riba nan propiedadnan, pa controla y vigila esaki. Hasta si nan tin e cantidad di siguridad necesario den e hotel. Hopi biaha ta tende di e incidentenan cu ta sosode den camber di hotel, den lobby of lift ora turistanan ta subi y esaki un biaha mas e responsabilidad comaprti cu tin. Mescos cu autonan cu ta wordo horta den parkingkot di hotel of cercania di hotel. Esaki ta un responsabilidad cu mester wordo comparti y tur hende mester carga esaki conhuntamente, segun e mandatario.

Source: Dutch Caribbean News Minister Otmar Oduber: Cada incidente por causa un desater den mundo turistico