Otro siman contratista ta cuminsa basha asfalt pa Vierbaansweg di Green Corridor

DOW ta anuncia

ORANJESTAD   (AAN): Na DOW tabata tin conferencia di prensa caminda Jossy Kock a hiba palabra y splica riba trabaonan cu ta cla pa cuminsa pa basha asfalt. Den proximo dianan e conexion cu ta bin di Canashito pa Mahuma lo wordo sera.

Esaki ta encera cu e duiker cu tambe lo bin eynan. Tin un duiker existente y lo bin uno nobo. A pone un material caba pa e asphalt cu ta bin. Na Sero Teishi a cuminsa forma caba e parti di rotonde segun Jossy Kock.

Trabaonan mas pariba ta cuminsa otro siman cu comienzo di un duiker nobo banda di veld di Duracell. E caminda cu ta conecta cu e highway tambe lo wordo sera banda di Mahuma.  E habitantenan mester  cuminsa cu acceso pa e caminda principal lo no bai tin mas den e area ey so. Na e parti di Kibaima tambe e contratistanan ta bezig.

Jossy Kock a splica cu e caminda principal no ta bai haya influencia riba e trabaonan cu excepcion di e cruzada di Mahuma. Mas pariba banda di Yaraweg etc tambe tin trabaonan ta bai cuminsa. Jossy Kock a splica cu varios trabou lo sigui simultaneamente. E parti di acera tambe lo bai cuminsa. En general e planning ta riba schema. Tin un retraso y tin un brug cu mester wordo traha pafo di Aruba y bin pa despues wordo arma.

Jossy Kock a splica cu a cuminsa construi e brug caba. Waf a cuminsa muda tambe. Mientrastanto e movecion mester tuma lugar riba e caminda existente. E intencion tabata pa nan cana hunto pa asina move waf di carga. Awor aki segun Jossy Kock e proyecto no a cana paralelo. Tin un caminda cu a wordo sera entre Barcadera cu Sero Teishi. E caminda aki ta keda sera pasobra e conexion no ta cla.

Source: Dutch Caribbean News Otro siman contratista ta cuminsa basha asfalt pa Vierbaansweg di Green Corridor