WILLEMSTAD, Curacao — Djadumingu 1 di novèmber 2015, alrededor di 14.30’or Sentral di Polis a risibí notifikashon ku riba George Maduroweg un vehíkulo a dal den un Konvoi i ku tin vários herido.
For di un investigashon ku polis a realisá na e sitio a resultá ku shofùr di un outo ku tabata koriendo riba SBN van Staverenweg direkshon Van Engelen a krusa George Maduroweg sin duna preferensia na un Konvoi ku tabata bini riba George Maduroweg direkshon pòmp di gasolin Cas Coraweg, ku konsekuensia ku e outo a dal den e Konvoi.
A konsekuensia di e choke aki e shofùr di e Konvoi a pèrdè kontròl riba su stürwil i bai dal den un kas situá riba SBN van Staverenweg.
E shofùr di e outo despues di e choke a dal den kura di un kas riba George Maduroweg.
A konsekuensia di e aksidente aki tabata tin vários herido den e Konvoi i 2 herido den e outo.
Tur a keda transportá ku ambulans di tantu F.K.A. i ambulans di Rode Kruis pa poliklínika di SEHOS pa tratamentu. Despues di tratamentu e víktimanan di e konvoi por a bai kas miéntras e dos víktimanan di e outo a keda interná pa opservashon.
Departamento di Tráfiko ta kontinuá ku e investigashon.
Aksidente di trafiko ku varios herido
