ORANJESTAD (AAN): Carnaval ta tras di lomba, pero toch tin un sabor un tiki amargo pa cierto desaroyonan cu ta toca tambe departamentonan cu ta cay bao di ministerio di Husticia.
Minister di Husticia, mr. drs. Arthur Dowers, a bisa principalmente cu e sabor amargo ta cerca esnan cu a participa den carnaval, pasobra tabata tin un mal organisacion y mal planificacion pa loke ta trata e orario y pa e motibo ey e carnaval a caba mucho laat.
Ta compronde berdad cu or e hendenan a bay den e actividad aki, pa bin te anochi laat y den scuridad.
Sinembargo esey a cay completamente pa responsabilidad pa esnan cu ta coordina y organisa e carnaval. A palabra, cu nan ta esnan cu ta percura pa e movecionnan den carnaval y polis lo percura pa orden publico.
Pa percura pa e parti di trabao di polis, el a bay bon. Claro cu no ta contento cu e cantidad di detencionnan cu tin, comokiera cu a sinti cu hopi hende por comporta nan mes diferente.
Si tene cuenta cu mas y mas ta mira muchanan hopi jong, 13, 14 aña cu ta cay den man di polis y esey ta lamentabel.
Ta spera toch cu muchanan asina chikito ta respeta polis y no ta bebe y no ta den oranan largo asina riba caya.
Sinembargo e ta keda un problema y cada biaha cu nos mustra riba e problema aki, ta haya un sra. Evelyn Wever-Croes, un Guilfred Besaril of un Andin Bikker, cu no ta e muchanan ta e problema, pero ta polis y ministerio publico y minister di husticia ta e problema. Ta spera cu por mustra tambe e diferente grabacionnan cu tin pa mustra e comportacion di e hendenan aki y por ta por reflexiona y purba bin na un comportacion mas miho.
Pa loke ta e organisacion mes di carnaval, a palabra cu lo bin un evaluacion dentro di e departamento di polis. Husticia no ta bay over di carnaval. No kier bay over di carnaval tampoco, segun e minister. Ta bay evalua si ora cu cu pone cu door di un mal planificacion, cuerpo policial ta haya nan mes cu extra trabao y gasto. E vergunning ta wordo duna door di Ministerio di Algemene Zaken, pero e costonan ta core pa e presupuesto di husticia. Esey ta pone cu husticia tin cu evalua y mira pa futuro y no lo bay conta pa carnaval so, sino pa tur evento cu na momento cu duna un vergunning y planea e inzet di polis na un forma, cu e tin cu para na cierto momento, cu si esey no tuma luga, mester bin multa.
Mester papia di multanan considerabel. Ta papiando aki di multanan di 5000 of 10mil florin cu tin cu cay na momento cu no ta tene nan mes na e orarionan stipula. Esey lo bay conta tambe pa tur otro eventonan cu lo bay bin pa e aña aki y tambe tin cu bay haci’e pa loke ta clubnan nocturno. No ta bay keda bringa cu hende awor aki. Durante varios ocasion den pasado, a bay para evento y cera luga, etc. Esey mester pasa pa pasado. Awo tuma responsabilidad riba bo mes, bo no cumpli, bo ta haya cu multa grandi pa asina bo siña. Mester bira momento cu esnan cu no kier scucha, tin cu sinti.
Minister Dowers: Si ta manda bo kier manda, atende cu e consecuencianan
