ORANJESTAD (AAN): Autoridad ta buscando e homber Michelangelo Trinidad relaciona cu e asesinato banda di Olde Molen dialuna marduga. E sospechoso aki ta conoci caba pa Polis.
Informacion ta bisa cu den oranan di anochi laat of marduga dos grupo di San Nicolas a topa otro den e area sea paden of pafo. Aki e bouncernan a haci nan trabou y core cu nan. E cos no a caba pasobra parce e sospechoso Michelangelo Trinidad mes lo a laga sa cu nan lo bolbe y lo tira. El a cumpli tambe pasobra ora cu el a bolbe e localidad lo tabata sera caba pero pafo e bouncernan tabata ta dal drinks parce. Eynan parce cos a bai for di man ora cu Michelangelo a bin pa regla cuenta.
Ta e bouncernan so lo tabata para eyfo. Claramente por mira cu Michelangelo tambe lo a haya sla pasobra den e proceso te hasta su keds a keda atras. Un pia di keds so el a logra bandona e sitio cune.
Awor aki tin un buskeda general pa e sospechoso aki. Aunke gruponan cu ta frecuenta Cayenastraat, ta conoci cu nan tin problema cu esnan di Village. E dos gruponan aki ta basta den noticia ultimamente.
Awor nan a topa otro te banda di hotelnan banda of den Olde Molen. Resultado di e encuentro aki tabata cu un morto a cay y e morto no ta den e grupo cu tin problema cu otro. Un otro bouncer tambe ta herida. Team di Aresto ta wardando e luz berde pa haci e atake pa piki Michelanelo Trinidad kende tin un ordo di detencion pe.
Lamentablemente mientras cu na Aruba e informacion ta plama tur caminda, autoridad ta haci manera ningun hende sa di nada. For di prome instante cu tin sospecho riba e figura aki, tabata na su lugar pa manda un buskeda via tur media cu su potret pa asina pueblo yama mesora si cualkier persona señal’e un caminda.
Aki na Aruba autoridad ta traha den forma anticua. Rond mundo ta mira con den un rato di tempo imagennan di cualkier sospechoso ta wordo publica pa tur hende yuda pa paradero di un sospechoso. Na Aruba ta keda draai y draai te cu na final hopi biaha e criminalnan ta huy bai.
Den e caso aki pa su mesun bon ta bon pa e entrega pasobra cualkier mal movecion durante su buskeda por resulta fatal pe. Si abo tin informacion yama 11141 cu ta e tipline di Polis.
Michelangelo Trinidad sospechoso principal pa tiramento riba Bouncer di Olde Molen
